اسلام آباد۔10اگست(اے پی پی) وفاقی وزیر داخلہ محسن نقوی وفاقی دارالحکومت دے تھاݨیں کوں سمارٹ پولیس سٹیشن دی طرز تے اپ گریڈ کرݨ دا حکم ݙیندے آکھیے روایتی تھاݨے خوف دی علامت بݨ چکئن ، سائل تھاݨے آوݨ توں پہلے کئی واری سوچیندے ۔ وزارت داخلہ توں جاری اعلامیہ موجب وفاقی وزیر داخلہ محسن نقوی دی صدارت اچ اسلام آباد دے تھاݨیں دی اپ گریڈیشن تے پیش رفت متعلق جائزہ اجلاس تھیا ۔ وزیر داخلہ وفاقی دارالحکومت دے تھاݨیں سمارٹ پولیس سٹیشن دی طرز تے اپ گریڈ کرݨ دا حکم ݙیندے آکھیے روایتی تھاݨے خوف دی علامت بݨ چکئن ، سائل تھاݨے آوݨ توں پہلے کئی واری سوچیندے محسن نقوی آکھیے خود وی تھاݨیں دا دورہ کیتے جیڑھی حالت زار ݙٹھی اے او بیان نی کیتی ونڄ سڳدی۔ اسلام آباد پاکستان دا چہرہ اے ، اسلام آباد کوں عالمی معیار دا شہر بݨاوݨ سانڳے بلاتاخیر سمارٹ پولیسنگ دے پاسے ونڄݨا اےِ ، سمارٹ پولیس سٹیشن سانڳے ہرممکن وسائل ݙیسوں ۔ وزیر داخلہ آکھیے خوش اخلاق و تعلیم یافتہ پولیس افسراں کوں سمارٹ پولیس سٹیشن اچ تعینات کیتا ویسی ، مرحلہ وار پروگرام نال تھاݨے اپ گریڈ کیتے ویسن اتے سمارٹ پولیس سٹیشن اچ بدالیا ویسی ۔ وزیر داخلہ محسن نقوی وختی پلان تے عمل کرݨ دی ہدایت کریندے آکھیے اپ گریڈیشن سانڳے گھٹ لاڳت نال معیاری ڈیزائن تیار کیتا ونڄے، انہاں آکھیے اسلام آباد پولیس اچ بھرتی سانڳے میرٹ تے کوئی سمجھوتا نہ تھیسی ، ہر لحاظ نال فٹ، تعلیم یافتہ تے میرٹ تے پورے لہݨ آلے نینگراں کوں بھرتی کیتا ویسی ۔ اجلاس اچ وفاقی سیکرٹری داخلہ خرم علی آغا، چیئرمین سی ڈی اے محمد علی رندھاوا، ڈی آئی جی آپریشنز اتے اعلیٰ حکام شرکت کیتی
