اسلام آباد۔18جون (اے پی پی):وزیر اعظم عمران خان جمعے کوں داسو ڈیم پڄ ڳئن۔ وزیراعظم آفس دے میڈیا ونگ توں جاری بیان موجب وزیر اعظم داسو ڈیم تے جاری تعمیراتی کم دا جائزہ گھنسن ۔ داسو ڈیم فیز ون 2025 اچ مکمل تھی تے نیشنل گرڈ اچ 2160 میگاواٹ دی فراہمی شروع کر ݙیسی جݙاں جو 2029 اچ فیز ٹو دے مکمل تھیوݨ دے بعد ڈیم دی استعداد 4320 میگا واٹ تھی ویسی ۔وزیر اعظم عمران خان دے پاور سیکٹر اصلاحات اتے ملکی پاݨی دے وسائل دے بہتر استعمال دے ویژن دے تحت موجودہ دور حکومت اچ داسو ڈیم تے کم دی رفتار کوں ودھایا ڳئے۔ ڈیم دی تعمیر کیتے زمین دی خریداری دا کم مکمل کر ڳھدا ڳئے تے کورونا وائرس دی وبا دے باوجود ایس او پیز تے عملدرآمد کریندے ہوئیں ڈیم دی تعمیر جاری اے۔ ایں موقع تے وزیر اعظم ڈیم تے کم کرݨ آلے غیر ملکی انجینئرز اتے مزدوراں نال وی ڳال کریسن۔
