اقوام متحدہ۔18اکتوبر (اے پی پی):پاکستان غزہ اچ جنگ بندی سانڳے روس دی طرفوں پیش کیتی ڳئی قرار داد کوں منظور کرݨ اچ اقوام متحدہ دی سلامتی کونسل دی ناکامی تے مایوسی دا اظہار کیتے ۔ اقوام متحدہ اچ پاکستان دے مستقل مندوب منیر اکرم اے پی پی کوں ݙسائے جو پاکستان کئی عرب اتے او آئی سی دے رکن ملکاں نال رل تے ایں قرار داد دی حمایت کیتی ہئی ۔انہاں آکھیے جو ایں مرحلے تے غزہ اچ وختی جنگ بندی دی لوڑھ اے تے روسی مسودہ قرارداد جیں اچ وختی طور تے انسانی بنیاداں تے جنگ بندی دا مطالبہ کیتا ڳیا ہئی دی سلامتی کونسل دی طرفوں منظوری اچ ناکامی انتہائی مایوس کن اے۔ایں قرار داد دی امریکا ، برطانیہ ، فرانس اتے جاپان مخالفت کیتی ہئی جݙاں جو البانیہ، برازیل، ایکواڈور، گھانا، مالٹا اتے سوئٹزرلینڈ ایں قرار داد تے رائے شماری اچ حصہ نی ڳحدا جیں دی وجہ توں ایں قرارداد کوں منظوری سانڳے مطلوبہ نو ووٹ نی مل سڳیے ۔ قرار داد دی حمایت چین، گیبون ، موزمبیق، روسی فیڈریشن اتے متحدہ عرب امارات کیتی ہئی ۔ایں قرار داد دی تیاری اتے اینکوں سلامتی کونسل اچ پیش کرݨ دی حمایت پاکستان، بحرین، اردن، سعودی عرب، مصر، متحدہ عرب امارات، قطر، کویت، عمان، لبنان، یمن، انڈونیشیا، ملائیشیا، ترکی، بنگلہ دیش، مالدیپ ، موریطانیہ، سوڈان، جبوتی، اریٹیریا اتے مالی۔ زمبابوے، نکاراگوا اتے وینزویلا کیتی ہئی ڄݙاں جو فلسطین وی ایندے مسودے دی حمایت کیتی ہئی ۔
