اسلام آباد۔3ستمبر(اے پی پی)وزیراعظم محمد شہباز شریف آکھیے جو کراچی ملک دا اہم ترین شہر اتے ملکی معیشت دی ریڑھ دی ہڈی اے، کراچی دے مسلیاں دا حل حکومت دی اڳونہی ترجیح اے،۔ اے ڳالھ انہاں اسلام آباد اچ متحدہ قومی موومنٹ پاکستان دے چیئرمین، وزیر سائنس و ٹیکنالوجی اتے تعلیم و پیشہ ورانہ تربیت خالد مقبول صدیقی دی اڳواݨی اچ ملݨ آوݨ آلے وفد نال الیندے آکھی۔ وفد مہانگ دی شرح ڳھٹ تھیوݨ تے وزیراعظم خراج تحسین پیش کریندے کاروبار دوست پالیسیاں اتے برآمدی صنعت دی ترقی کیتے اقدامات دی تعریف کیتے۔ وفد معیشت دی ترقی، ملکی معاشی مراکز بالخصوص کراچی دے لوکاں دی خوشحالی کیتے تجاویز ݙتن۔ وفد اچ اراکین قومی اسمبلی ڈاکٹر محمد فاروق ستار، مصطفیٰ کمال اتے سید امین الحق وی ہن۔ وزیراعظم آکھیا جو ایم کیو ایم پاکستان حکومت دی اہم اتحادی جماعت اے، اتحادی جماعتاں نال رل تے ملکی ترقی کیتے تیزی نال کم تھیندا پئے۔ ملاقات اچ سندھ خاص کر کراچی اتے ٻئے شہری علاقیان دے مسلیاں تے ڳالھ مہاڑ تھئی۔ ملاقات اچ نائب وزیراعظم و وزیر خارجہ محمد اسحاق ڈار، وفاقی وزیر قانون و انصاف اعظم نذیر تارڑ اتے مشیرِ وزیراعظم برائے سیاسی امور و بین الصوبائی روابط رانا ثناء اللہ وی موجود ہن۔
