اسلام آباد۔1اپریل(اے پی پی)وزیراعظم عمران خان آکھیے جو تحریک عدم اعتماد ہک ٻہوں وݙی عالمی سازش اے، دھمکی آمیز خط کوں او آئی سی اجلاس پاروں ظاہر نئیں کیتا، ایں سانڳے آݙت کوں وݙا سرپرائز ݙیسوں، جیکر عدم اعتماد جیت ڳیوسے تاں ویلھے توں پہلے انتخابات دا آپشن استعمال کریسوں اتے عوام کوں آکھساں جو اڳلی واری ساکوں بھاری اکثریت ݙیون جو ملک ٹھیک کر سڳاں، میݙی جان کوں خطرہ اے اتے اپوزیشن ماضی آلی کار میݙی کردار کشی دا سوچی ٻیٹھی اے، خیبرپختونخوا انتخابات اچ کامیابی عوام دے تحریک انصاف تے اعتماد دا ثبوت اے۔ ہک انٹرویو اچ وزیراعظم آکھیے جو خط دا متن واضح ہے جو تحریک عدم اعتماد ملی بھگت دا نتیجہ اے اتے اپوزیشن دے لوک کیوں غیرملکیاں نال ملدے ودے ہن؟ میݙے کولو پکیان رپورٹاں ہین جو کیہڑا سیاستدا، صحافی اتے اینکر سفارتخانیاں دے چکر لیندا رہے، ایں توں وݙی ملکی معاملات اچ مداخلت ٻئی کیا ہوسی جو رجیم تبدیل نہ کیتی تاں نتائج بھڳتݨے پوسن؟ وزیراعظم استعفے دا امکان مسترد کریندے آکھیے جو چھانگا مانگا دی ݙینھ لڳے ڳین، چھیکڑی گیند تئیں مقابلہ کریساں، نویں الیکشن سب توں بہترین طریقہ اے، چاہنداں جو لوک عدم اعتماد دے ݙینھ غداراں دی شکلاں سنڄاڑن۔ انہاں آکھیا جو فوج نال چنڳے تعلقات ہین، کݙاھیں وی اپݨی فوج دے خلاف نا الیساں، فوج دا اپݨا ویو اے اتے جیکر فوج تکڑی نا ہووے تاں ملک ترٹ ونڄے۔ وزیراعظم آکھیے جو پورا ڄڳ میݙی پالیسیاں دی تعریف کریندے اتے اے میکوں نااہل آہدن، میکوں ہٹا تے اے ملک کیویں چلیسن؟ شہبازشریف کیوں آ تے پٹرول سستا کریسی؟ شہبازشریف تے مجرمانہ کیسز ہین اے کیویں وزیراعظم ٻݨݨ دے چکر اچ اے، شہبازشریف نیشنل سکیورٹی اجلاس اچ تہوں نئیں آیا جو اے سازش دا حصہ اے، نوازشریف لندن اچ حسین حقانی نال 3 مارچ کوں ملین، ساݙے کولو ثبوت ہین، زرداری، نوازشریف نسب توں ودھ ملک کون نقصان پچائے، ایندی دھی کھل تے فوج کوں پݨیے، مشرف انہاں کوں این آر او ݙتے، ایںجھے لوک قوم دے غدار ہین بھل میں پاکستان دی آزاد فارن پالیسی کیتے کھڑاں، قانون دی حکمرانی، فلاحی ریاست، خودداری اتے آزاد خارجہ پالیسی بنیادی ستون ہین جیڑھے مادر وطن دی خودمختاری، ترقی اتے خوشحالی دے ضامن ہین، ملکی سلامتی و خودادری تے سمجھوتہ نئیں کیتا ونڄ سڳدا۔ وزیراعظم عمران خان آکھیے جو کرسی ݙیوݨ اتے ولا ڳھنݨ آلا صرف اللہ اے، میکون چنتا کائنی، میں پہلے وی اپݨے ڳھر راہنداں اتے سوائے سیکیورٹی دے اپݨے خرچے آپ چینداں۔
