اسلام آباد۔13جولائی (اے پی پی):وزیر خارجہ مخدوم شاہ محمود قریشی آکھیے جو روس،چین اتے وسطی ایشیا دے ملک خطے دے اہم ممالک ہن،افغانستان دے حوالے نال اساں انہاں اہم ملکاں نال مشاورت دے بعد متفقہ حکمت عملی بݨیسوں ۔منگل کوں تاجکستان اچ منعقدہ شنگھائی تعاون تنظیم دی وزرائے خارجہ کونسل دے اجلاس اتے افغانستان دی بدلدی صورتحال دے حوالے نال ھک بیان اچ وزیر خارجہ آکھیے جو میں ایں ویلھے شنگھائی تعاون تنظیم دی وزرائے خارجہ کونسل دے اجلاس اچ شرکت کیتے تاجکستان اچ موجود ہاں۔تاجکستان دے وزير خارجہ نال افغانستان دی صورتحال تے میں تفصیلی ڳال مہاڑ تھئی ،اڄ (منگل) کوں میݙی ازبکستان،قزاخستان ، افغانستان ،روس اتے چین دے وزرائے خارجہ نال وی ملاقات متوقع اے۔ وزیر خارجہ آکھیے اے سارے خطے دے اہم ملک ہن تے افغانستان دی صورتحال تے وی نظر رکھی ہوئی اے ، اساں چاہندوں جو انہاں اہم ملکاں نال مشاورت دے بعد متفقہ حکمت عملی اپنائی ونڄے ۔ وزیر خارجہ آکھیے جو پاکستان اپݨی ذمے وارياں۔ چنڳے طریقے نال نبھیندا پئے ۔ خدانخواستہ افغانستان دی صورتحال وڳڑدی اے تاں سارے متاثر تھیسن ۔ اے مشاورتی عمل کوں اڳوں ودھاوݨ دا سنہری موقع اے ۔انہاں آکھیے جو پاکستان واحد ملک اے جیڑھا کئی دھائیاں توں 30 لکھ افغان پناہ گزيناں دی خدمت کریندا پئے ۔جے ہݨ خدانخواستہ حالات خراب تھیندن تاں اساں مزید افغان پناہ گزيناں کوں رکھݨ دے متحمل نی تھی سڳدے ، انہاں آکھیے جو افغان پناہ گزیناں دی آڑ اچ ایجھے عناصر وی داخل تھی سڳدن جیڑھے اساکوں ضیان پڄاون ۔وزير خارجہ آکھیے جو بھارت افغانستان اچ سپائلردا کردار ادا کيتے تے خطے دے امن اچ خلل پیدا پئے ،عالمی برادری کوں چاہیدے جو او بھارت کوں منفی رويئے توں روکے جݙاں جو بھارت افغانستان کوں امن نال رہݨ ݙیوے ۔
