اسلام آباد۔19اکتوبر (اے پی پی) وزیراعظم محمد شہباز شریف آکھیا جو چین پاکستان اقتصادی راہداری منصوبیاں کوں مقررہ مدت اچ پورا کرݨ قومی ترجیح اے، صنعتی ترقی دا نواں دور شروع تھیندا پے۔ایم ایل ون منصوبہ پاکستان ریلوے دی معاشی بحالی اتے ترقی دا سبب ٻݨسی۔ بدھ کوں وزیراعظم آفس دے میڈیا ونگ توں جاری بیان دے مطابق وزیرِ اعظم محمد شہباز شریف دی صدارت چین پاکستان اقتصادی راہداری اتے ٻئے چینی منصوبیاں تے پیش رفت دا جائزہ اجلاس تھیا۔ اجلاس اچ انفراسٹرکچر دے منصوبے خصوصی طور مین لائن ون (ایم ایل ون)، کراچی سرکلر ریلوے، قراقرم ہائی وے تے ٻے منصوبیاں تے تفصیلی بریفنگ ݙتی ڳی۔ ایندے علاوہ ݙاہ ہزار میگاواٹ شمسی توانائی دے منصوبے اتے پن بجلی دے منصوبیاں تے وی ڳالھ تھئی۔ اجلاس کوں سی پیک منصوبیاں دی اڄوکی صورتحال، جاری کم اتے مستقبل اچ انہاں منصوبیاں دی رفتار کوں تیز کرݨ کیتے لائحہ عمل پیش کیتا ڳیا۔ اجلاس اچ وزیرِ اعلی سندھ وزیرِ اعظم دا کراچی سرکلر ریلوے کوں سی پیک دا حصہ ٻݨاوݨ تے شکریہ ادا کیتا۔ ایں موقع تے اجلاس نال خطاب کریندیں ہوئیں وزیراعظم آکھیا جو چین پاکستان اقتصادی راہداری منصوبیاں کوں مقررہ مدت اچ پورا کرݨ قومی ترجیح اے، صنعتی ترقی دا نواں دور شروع تھیندا پے۔ اجلاس اچ سابق وزیراعظم شاہد خاقان عباسی، وفاقی وزراء احسن اقبال، خواجہ سعد رفیق، سالک حسین، سید نوید قمر، مریم اورنگزیب، سید مرتضی محمود، طارق بشیر چیمہ، مشیرِ وزیر اعظم احد چیمہ، وزیرمملکت برائے پٹرولیم ڈاکٹر مصدق ملک، معاونین خصوصی طارق فاطمی، ظفرالدین محمود، جہانزیب خان، سید فہد حسین، وزیر اعظم دے کوآرڈینیٹرز رانا احسن افضل، بدر شہباز اتے متعلقہ اعلی حکام شریک تھیے جڈانجو وزیرِ اعلی سندھ سید مراد علی شاہ وڈیو لنک دے ذریعے اجلاس اچ شریک تھیے۔
