حیدرآباد۔6اکتوبر (اے پی پی):انڈس ہائی وے تے ݙراکلے حادثے اچ 14 لوک جاں بحق تھی ڳئن ، ہلاک تھیوݨ آلیں اچ 3 تریمتاں تے 2 ٻال وی شامل ہن ،انڈس ہائی وے تے پنجاب توں کراچی ونڄݨ آلی مسافر بس ݙوجھے پاسوں آوݨ آلے ٹرک نال ٹکرا ڳئی حادثہ رات4 وڄے پیش آئے ،ݙو گھنٹے تئیں مسافر سڑک تے تڑپدے رہیے ، مقامی لوکاں تے موٹر وے پولیس مانجھند ہسپتال پڄایا ،مینھ تے سیلاب دے بعد ترائے ہفتے توں بند انڈس ہائی وے کوں مرمت دے بعد ٹریفک دی آوںڄ کیتے کھولیا ڳئے تاں جو ٻدھ تے خمیس دی وچلی رات سویلے 4 وڄے انڈس ہائی وے تے سن اتے مانجھند دے درمیان تھوڑی پھاٹک دے نیڑے ݙراکلہ ٹریفک حادثہ تھئے ،تفصیلات موجب پنجاب دے علاقہ وہاڑی توں کراچی ونڄݨ آلی بس مخالف پاسوں آوݨ آلے ٹرک دے نال ٹکرا ڳئی جیں دے نتیجے اچ 14 لوک جاں تے 15زخمی تھی ڳئن جنہاں اچوں 10مسافر موقع تے ہی جاں بحق تھی ڳئن جݙاں جو 4 ہسپتال پڄ تے دم ݙے ݙتا ۔موٹر وے پولیس موجب حادثہ رات تقریبا ساڈھے ترائے تے چار ونڄے دے درمیان پیش آئے ،ایس ایس پی جام شورو جاوید بلوچ وی جائے حادثہ تے پڄے زخمیاں تے ہلاک شدگان دی تعداد ݙیکھ تے مانجھند ہسپتال اچ ہنگامی حالت دا اعلان کیتا ڳئے جݙاں جو شدید زخمیاں کوں ایدھی ایمبولینس دے زریعے لیاقت یونیورسٹی ہسپتال جام شورو اتے سول ہسپتال حیدرآباد پڄایا ڳیا ۔ امدادی ٹیماں دے مطابق حادثہ رات انڈس ہائی وے تے ٹریفک گھٹ ہووݨ پاروں ٹرک اتے بس اچ ٹکر دی آواز سݨ تے نیڑے دیہات توں لوک آڳئن تاں زخمی سڑک تے تڑپدے پئے ہن ھک زخمی موجب سارے مسافر نندر وچ ہن جو اچاچیت اے حادثہ تھی ڳیا ۔خیال اے جو بس دے ڈرائیور کوں نندر دا جھٹکا لڳیا ہووے تے ایں دوران بس ٹرک نال ٹکرا ڳئی۔ ایدھی دے ترجمان معراج احمد’’ اے پی پی ‘‘کوں ݙسایا جو شدید زخمیاں تے لاشاں سول ہسپتال ،حیدرآباد منتقل کرتے لاشاں سول ہسپتال دے مردہ خانیں اچ رکھ ݙتیاں ڳئن ، جاں بحق لوکاں اچ محمد اشرف ولد خدا بخش ، عتیق الرحمن ولد عبدالرحمن ،اجمل ، جاوید ولد انور، حسنین ولد ذوالقرنین ،عظمیٰ خاتون ولد شاہنواز، نورین زوجہ ذوالقرنین ،راشد ولد کریم بخش ،طارق ولد غلام علی،پہلوان ولد عبدالقادر،خدیجہ،ثمر عباس اتے مختیار حسین شامل ہن ۔ زیادہ تر ہلاک شدگان دا تعلق بہاولپور توں ݙسایا ویندے 15 زخمیاں اچوں 5دی حالت نازک اے انہاں کوں لیاقت میڈیکل سول ہسپتال حیدرآباد اتے لمس ہسپتال جام شورو اچ طبی امداد ݙتی ویندی پئی اے ۔
