اسلام آباد۔21فروری (اے پی پی) صدر مملکت ڈاکٹرعارف علوی آکھیے پاکستان اپݨی معاشی صورتحال بہتر بݨاوݨ سانڳے برآمدات ودھاوݨ تے توجہ ݙیندا پئے ،پاکستان غیرملکی کمپنیاں دے نال سانجھے طور تے فیدہ مند کاروباری شراکت داری چاہندے ۔ او ٻدھ کوں ایوان صدراچ نمک اتے معدنیات دے شعبے دی امریکی کمپنی دے وفد نال ملاقات اچ ڳالھ مہاڑ کریندے پئے ہن ۔ وفد صدر مملکت کوں لوݨ دی کان کنی ، پراسیسنگ اتے مارکیٹنگ اچ کمپنی دے کردار بارے بریفنگ ݙتی۔صدرمملکت ڈاکٹرعارف علوی آکھیے پاکستان مختلف شعبیں اچ ٻاہرلی سرمایہ کاری تے جوائنٹ وینچرز دا ودھارا چاہندے ، پاکستانی لوݨ دی بہتر پراسیسنگ، پیکجنگ اتے مارکیٹنگ دی قدر اچ ودھارا کیتا ونڄ سڳدے ، پاکستانی لوݨ اعلی ٰ معیار اتے ٻہوں گھٹ سرمایہ کاری توں ڳھدا ونڄ سڳدے ، حکومت سرمایہ کاراں کوں سہولت ݙیوݨ سانڳے پرعزم اے ۔ صدر مملکت مریکل سالٹ ورکس کمپنی کوں پاکستان اچ سرمایہ کاری کرݨ دی تعریف کیتی ۔صدر مملکت مریکل سالٹ ورکس اتے پاکستان منرل ڈویلپمنٹ کارپوریشن وچال معاہدے تے دستخط کوں وی خوش آئند قرارݙتے ۔وفدصدر مملکت کوں زر مبادلہ کماوݨ اچ پاکستانی لوݨ دی کاناں دی صلاحیت بارے ݙسایا جو معیاری اتے منرلزتوں بھرپور راک سالٹ دنیا اچ صرف پاکستان اچ پاتا ویندے ، پاکستانی لوݨ گھٹ قیمت تے اعلی معیار دا حامل اے۔
