اسلام آباد۔5جون (اے پی پی):صدر مملکت ڈاکٹر عارف علوی کامسٹس یونیورسٹی دی طرفوں داخلہ منسوخ کرݨ دے خلاف طالب علم دی اپیل منظور کریندے ہوئیں وفاقی محتسب دا فیصلہ مسترد کر ݙتااتے یونیورسٹی کوں طالب علم کوں ڈگری مکمل کرݨ دا موقع ݙیوݨ دی ہدایت کرݙتی ایوان صدر دے پریس ونگ توں جاری بیان موجب صدر مملکت آکھیے کامسیٹس یونیورسٹی طالب علم کوں ڈگری مکمل کرݨ دا موقع ݙیوے ۔ یونیورسٹی 7 سمسٹر مکمل تھیوݨ دے بعد طالب علم دا داخلہ منسوخ کرݙتا ہئی ۔ تفصیلات موجب حماد بن زین دا داخلہ 2017 اچ گھٹ نمبر گھنݨ دی بنیاد تے ساڈھے 3 سال بعد منسوخ کیتا ڳئے ۔ صدر مملکت آکھیے حیرت دی ڳالھ اے جو یونیورسٹی اتنی وݙی غلطی کیتی، حیران کن ڳالھ اے جو ساڈھے 3 سال بعد طالب علم کوں ݙسایا ڳئے جو او داخلے دا اہل کائنی ۔ صدر مملکت آکھیے طالب علم 8 سمسٹر دی فیس ادا کیتی تے تندہی نال 7 سمسٹر مکمل کیتے، طالب علم دی غلطی نہ ہووݨ دے باوجود ایندا مستقبل دائو تے لڳ ڳیا ڈاکٹر عارف علوی آکھیے انصاف داتقاضا اے جو طالب علم کوں ڈگری پروگرام مکمل کرݨ دی اجازت ݙتی ونڄے ۔
