اسلام آباد۔18اگست (اے پی پی):صدر مملکت ڈاکٹر عارف علوی پورے ملک اچ شجر کاری کیتے مشترکہ کوششاں دی لوڑھ تے زور ݙیندے ہوئیں آکھیے جو جنگلات اچ ودھارے توں پائیدار ترقی کوں ودھݨ ، ملک کوں ماحول دوست بݨاوݨ تے آندیاں نسلاں دا مستقبل محفوظ بݨاوݨ اچ مدد ل ویسی ، ملک دا ہر شہری شجرکاری مہم اچ بھرپور حصہ پاوے ، وݨ رہاوے تے انہاں دی ݙیکھ بھال وی کرے ، اساں سانجھیان کوششاں توں موسمیاتی تبدیلی دے اثرات کوں گھٹ کرݨ تے پاکستان کوں ھک ساوا تے سوہݨا ملک بݨاوݨ اچ کامیاب تھی ویسوں ۔ قومی ساوݨ شجرکاری مہم دے آغاز تے آپݨے پیغام اچ انہاں آکھیے جو موسمیاتی تبدیلی اتے عالمی درجہ حرارت اچ ودھارے دنیا دے مختلف حصیں اچ گلیشیر پگھلݨ تے چھل آوݨ دا سبب بݨدا پئے ۔ پاکستان دا ماحولیاتی نظام وی موسمیاتی تبدیلی ، گلوبل وارمنگ اتے جنگلات کٹݨ دی وجہ توں خطرے توں ݙوچار اے ، ھک اڄوکی رپورٹ موجب پاکستان موسمیاتی تبدیلی توں ساریں وں ودھ متاثر تھیوݨ آلا اٹھواں ملک اے ۔ پاکستان ، فلپائن اتے ہیٹی جہیے ملکاں کوں اکثر قدرتی آفتاں دا سامݨا کرݨا پوندے ، انہان آکھیے ھک اندازے دے مطابق گزریل 19 سال اچ پاکستان کوں ماحولیاتی تبدیلی نال رلیے173 واقعات دا سامنا کرݨا پوندے تے اڄوکے سال وی پاکستان کوں سیلابی صورت حال دی وجہ توں تباہی دا سامݨا اے ۔
