اسلام آباد ۔ 25 دسمبر (اے پی پی) وفاقی وزیر اطلاعات تے نشریات آکھیے جو پوری قوم اپنڑے محسن کوں اج دے ڈینھ خراج عقیدت پیش کریندی ہے،قائداعظم محمدعلی جناح آئین اتے قنون دی حکمرانی تے کامل یقین رکھیندے ہن۔ منگل کوں چوہدری فواد حسین بابائے قوم قائد اعظم محمد علی جناح دے جمنڑے دے ڈینھ دے موقع تے اپنڑے پیغام اچ آکھیا جو قائداعظم ایجھا پاکستان چاہندے ہن جتھاں ہر بندہ اپنڑے مذہب ، عقیدے ، اتے سوچ مطابق اپنڑیں زندگی گزار سگے۔انہاں آکھیا جو انتہا پسندانہ سوچ قائد دی فکر دے منافی ہے،بابائے قوم پاکستان تے اپنڑاں سبھ کجھ وار ڈتا، پاکستان اتے نظریہ پاکستان امانت ہے، ایندی حفاظت ہر محب وطن دا قومی فرض ہے۔انہاں آکھیا جو پاکستان دے شہیداں سانگے اج پوری قوم اللہ سائیں دے حضور دعا کریندی پی ہے۔وفاقی وزیر اطلاعات تے نشریات چوہدری فواد حسین آکھیا جو اج دے ڈینھ پاکستان دی بہادر مسلح فوجاں، سیکورٹی اداریاں، پولیس، ایف سی اتے قنون نافذ کرنڑ آلے اداریاں کوں وی خراج تحسین پیش کرینداں جنہاں اپنڑیں رت ڈے تے دھرتی تے امن دے ڈیوے بالے ۔انہاں آکھیا جو قائداعظم محمدعلی جناح اصولاں دی علامت ہن،عمران خان قائد دے اصولاں دی روشنی اچ نواں پاکستان بنڑیندے پن۔انہاں آکھیاجو قائد اعظم دے پاکستان دی امانت اچ خیانت کرنڑ آلے کہیں قسم دی رعایت دے مستحق کائنہ ہن۔انہاں آکھیا جوعوام کوں غریب کرتے اپنڑے محل بنراونڑ آلیاں دے حساب دے ڈینھ آ گن ۔
