لاہور۔28جنوری (اے پی پی):وزیرِ اعظم عمران خان کوں ݙسیا ڳیا جو سینٹرل بزنس ڈسٹرکٹ منصوبے دے پہلے مرحلہ اچ 24 ارب روپے دی سرمایہ کاری تھئی، آندے مہینے ست ترقیاتی سائٹس دی نیلامی نال ٻئے ارباں روپے دی سرمایہ کاری متوقع اے۔جمعے کوں وزیراعظم آفس دے میڈیا ونگ توں جاری بیان دے مطابق لاہور دورہ دے موقع تے وزیراعظم عمران خان کوں سینٹرل بزنس ڈسٹرکٹ تے بریفنگ ݙتی ڳئی۔ بریفنگ اچ وزیراعظم کوں ݙسیا ڳیا جو سینٹرل بزنس ڈسٹرکٹ منصوبے دے پہلے مرحلہ اچ 24 ارب روپے دی سرمایہ کاری تھئی، آندے مہینے ست ترقیاتی سائٹس دی نیلامی نال ٻئے ارباں روپے دی سرمایہ کاری متوقع اے۔ منصوبہ لاہور دے ادھ اچ بین الاوامی معیار دے کاروباری مرکز تے رہائش دی سہولتاں ݙیسی۔ بریفنگ اچ ݙسیا ڳیا جو ایں منصوبے نال نہ صرف روزگار دے موقع پیدا تھیسن اتے ملک اچ سرمایہ کاری وی ودھسی اتے ریونیو اچ 1500 ارب روپے دا ودھارا وی تھیسی۔ ایں موقع تے وفاقی وزرا چوہدری فواد حسین ، اسد عمر، شفقت محمود، معاونِ خصوصی ڈاکٹر شہباز گِل، مشیرِ کامرس عبدالرزاق داؤد، وزیرِ مملکت اطلاعات و نشریات فرخ حبیب، وزیرِ اعلی پنجاب سردار عثمان بزدار، سی ای او سینٹرل بزنس ڈسٹرکٹ عمران امین، چئیرمین این اے پی ایچ ڈی اے لیفٹیننٹ جنرل (ر) انور علی حیدر، متعلقہ اعلی افسران اتے فیز ون دے سرمایہ کار شریک تھیے۔
