اسلام آباد۔14ستمبر (اے پی پی) وفاقی وزیر خزانہ و محصولات سینیٹر محمد اورنگزیب آکھیے جو ذخیرہ اندوزی اتے ناجائز منافع خوری نہ تھیوݨ ݙیسوں، مہانگ اچ مصنوعی ودھارے دے تدارک کیتے انتظامی اقدامات دے ذریعے ذخیرہ اندوزی تے قابو پاتا ویسی، چھل متاثرین دی تکھے بحالی کوں یقینی بݨایا ویسی، ملکی معیشت بہتری آلے پاسے ویندی پئی اے، ملک ترقی کریندا پئے اتے ٻاہروں سرمایہ کاری آندی پئی اے، تاجراں اتے سرمایہ کاراں کیتے سہولت پہلی ترجیح اے۔ کمالیہ اچ چھل متاثرہ علاقیں دے دورے دے موقع تے میڈیا نال ڳالھ مہاڑ کریندے وزیر خزانہ آکھیا جو وزیراعظم دی ہدایت تے کابینہ ݙو ایمرجنسیاں دا اعلان کر ݙتے جیں اچ کلائمیٹ ایمرجنسی اتے ایگری کلچر ایمرجنسی شامل ہن۔ ایمرجنسی دے تحت جیڑھا کجھ وی کرݨا پیا او پورے ملک کیتے کریسوں۔ انہاں آکھیا جو اساکوں ذمے واری دا احساس کریندے ہݨ اڳوں ودھݨا اے، ضلعی انتظامیہ موجودہ وسیلیں توں بہترین فیدہ چا تے متاثرین چھل کوں ریسکیو کیتے۔ وزیر خزانہ آکھیا جو مسئلے مکاوݨ کیتے ڈھانچہ جاتی اقدامات دی منصوبہ بندی کیتی ویندی پئی اے۔ انہاں آکھیا جو موسمیاتی تبدیلیاں توں وی مسئلے پیدا تھئن لیکن کجھ مسئلے انسان دے بݨائے ہوئن، اساکوں ݙیکھݨا ہوسی جو کاشتکاری کتھاں کرݨی چاہیدی اے اتے سوسائٹیاں کتھاں بݨاوݨیاں ہوسن۔ سینیٹر محمد اورنگزیب مزید آکھیا جو انہاں سارے اقدامات دی منصوبہ بندی کیتے ویلھا چاہیدے۔ اوکھے ویلھے اچ اساں کیتے ٻہوں سبق لکھئن۔ وفاقی وزیر ماحولیاتی تبدیلی 300 ݙینھاں کیتے تیار کیتے ڳئے منصوبے تے کم کریندے پئن اتے صوبیں دی صلاح نال ایں کوں چھیکڑی شکل ݙتی ویسی کیوں جو ایں تے عملدرآمد صوبیں ای کرݨا اے۔ زرعی شعبے دے حوالے نال ہک سوال دے جواب اچ وزیر خزانہ آکھیا جو مقامی، صوبائی اتے وفاقی حکومتاں، سٹیٹ بینک آف پاکستان سمیت ٻئے بینک اعداد و شمار تیار کریندے پئن۔ انہاں آکھیا جو پاݨی لہݨ دے بعد ݙاہ ٻارھاں ݙینھ اچ زرعی شعبے دے ضیان دا تخمینہ لاتا ویسی، جیں دی بنیاد تے سارے شراکت داراں دے نال رَل تے اڳوں ودھسوں۔
.jpg)
